Azərbaycanın populyar rep ustası Elşad Xose (Əliyev) sentyabrın 12-də həbs olunub. Yasamal rayon polis idarəsinin əməkdaşları tərəfindən keçirilən əməliyyat zamanı Elşad Xosenin üzərindən 0,553 qram heroin götürülüb.

Yasamal rayon polis idarəsinin istintaq şöbəsinin rəisi Anar Çıraqov APA-ya bildirib ki, onun barəsində Cinayət Məcəlləsinin 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddəsi ilə cinayət işi başlanıb, təhqiqat gedir.

Yasamal rayon məhkəməsinin qərarı ilə Elşad Xose barəsində 2 ay müddətinə həbs-qətimkan tədbiri seçilib. Cinayəti sübuta yetiriləcəyi təqdirdə Elşad Xoseni 3 ilədək həbs cəzası gözləyir.